杜甫 DU FU (712-770)
SOLDAU TORNA A CASA
Vense montes de ñubes encarnaes p´hacia´l poniente.
El sol espatexa pela tierra comu l´esnalopiar de gurriones.
El forasteru avieyara travesando´l país enteru.
La mio muyer arrespígase al ver que tovía esisto.
Ensuga unes llágrimes en cuantes que-y pasa la llercia.
Na portiella fierru xuxurien los focicos los vecinos: Ta vivu.
De nuechi cerráu prende ella otra llume
y arremiellámonos un pa l´otru comu nun suañu.
EL PERRU´L GANADOR
Ganamos. Escurez. Ando pel campu batalla.
Traigo nuna mano l´estandarte prietu.
El mio perru lládra-yos a los enemigos muertos.
Enseño-y dellos cadabres y póngome yo: Mordi.
Enseño-y dello sangre y póngome yo: Sorbi.
Pero´ l perru miu ye perorgullosu.
LA MÁZCARA
Espetes la buya llarga na seda roxa
comu yo espeto la espada nel gorboberu l´enemigu.
Cínchame los dos sables estos a los costaos
mentes solmeno yo la llancia cola manu drecha.
Añíclate y añuda´l mio cinchu
y gólvite a la que mos despidamos.
Esto non ye´l tortoriu, ye la mázcara
pa atarrecer al enemigu y non a ti.
LA FRONTERA
Quitámo-yos los arcos más tensaos y les llancies más llargues.
Matamos-yos de mano los caballos y darréu a los oficiales.
Lluchamos hasta algamar la frontera que defender.
Ponximos tope a cuantos había que matar.
Non queríemos facer estroza al enemigu,
namás vencelu.
