ONDE´L CAMIN ACABA
Al que ya va nortiando la salida
Apáguense-y les ganes de la vida
Nadar contra'l ravión agota y cansa
Hasta algamar el pielgu que remansa
Gane o pierda el premiu la partía
Cuatro sucos de tierra compartía
Gane o pierda el premiu la partía
Cuatro sucos de tierra compartía
Aquelles que comieren nes mios manes
Picaranles per dientro los buxanes
El número que a toos-yos traerá suerte
Ha de tocame acierte o non acierte
La llaceria mayor de la belleza
Ye vese podrecer ente maleza
Cuantu más grande faces la facina
Mayor ye'l resplandor que te calcina
La música onde más altu retumba
Ye nes inmediaciones de la tumba
Non fai falta la llave de la puerta
Que m'espera de par en par abierta
Flores que se desprenden del so aroma
Cuerpos que s'esmigayen de carcoma
El últimu cigarru que te toca
Fumar tamién sucumbe na to boca
Cabruño la guadaña bien pa cuando
La hora la verdá morrir matando
Dir pela vida aprisa o dir despaciu
Al final siempre toma'l mismu espaciu
Fíate del espíritu y apaña
Al contrariu que'l cuerpu non t'engaña
La única verdá que ye mentira
Ye escapar cola pata que se estira
La única mentira verdadera
Ye que la vida siempre acaba entera
Nel viaxe a la rexón que non se nombra
Non m´acompañará nin la mio sombra
Non se puede saber a cencia cierta
Lo que hai a la otra parte de la puerta
Del reló de la vida cae l'arena
La mio boca de tierra que s´enllena
Un tres d´otru la fila non s´agota
Camín de l´aposientu na derrota
Un tres d´otru la fila non s´agota
Camín de l´aposientu na derrota
