Coples llixeres
A Ana
Buenes tardes lo primeru
Que me pongo a desvariar
Y acabai de cacariar
Ellirriba’n gallineru.
*
Voi cantate equí unes coples
Pa animate nesta xera
Y que al compás de les copes
T’escalezca la foguera.
*
Non sé si ye el centenariu
O si son namás sesenta
Gocé tantu del calvariu
Que yá hasta perdí la cuenta.
*
Ay qué espesu y qué picante
Te salió güey el cocidu
Será que te dio palante
Pela nueche’l to maridu.
*
Cuando vengues a mío casa
Traime la preba’l tocín
Que yá sabes cómo engrasa
El mio Falo en Samartín.
*
Dicen qu’allá pa l’Ablana
Baxa a l’Infiestu un nuviellu
A golifar per Triana
Quién-y pele’l carapiellu.
*
Aquella muyer mexose
De tantu descoyuntase
Por ver a Xuacu correse
De gustu ensin empalmase.
*
Cuando te llegue la hora
Vas a dame de primicia
La pepitina que aflora
Pa vela yo cómo nicia.
*
Siempre pa la primavera
Cuando canten los malvises
Ábre-yos la ventolera
A les neñes les camises.
*
Na to calle una farola
Apágase cuando pases
Será porque pela Pola
Enciendes tantu que abrases.
*
Diba yo pa La Fontica
A por un sardu pación
Y noté una tarabica
Abultando en pantalón.
*
Dixo-y Mari la de Mon
Un día a César Fayuela
“Ven de nueche al mio balcón
Que yo te prendo la vela”.
*
Hai per Uvieu una esquina
Onde van los de Xixón
A reza-y a la Santina
Pa subir de división.
*
Les mociquines d’Uvieu
Van a la playa a Xixón
Que-yos unten el sobéu
Y espeten el aguixón.
*
Nacisti baxo un ablanu
Ente’l cuchu y la pación
Y volvisti americanu
D’esfesoriar en Ranón.
*
Va metiéndose payares
Y van menguando los díes
Cuando pares en Sevares
Pregunta por dos Maríes.
*
Cuando morrió El Caserón
Fixeren-y velatoriu
Y la fiya nun rincón
Descapulló’l tanatoriu.
*
Los de Ques son perfaroles
Los de Belonciu perfinos
Rellumen como los soles
Que se posen nos caminos.
*
Mio güela dio-y al Garruchu
Cuando la fue a cortexar
Un pastelín nun cartuchu
Que lu fizo empapizar.
*
La camarera del Cuetu
Que ta a puntu carambelu
Escalezse bien col güelu
Pa que l’arremueye’l nietu.
*
La Faba d’Espinaréu
Non da abastu cola ablana
Llímen-y la col preséu
Un vecín cada mañana.
*
Nel baille Pin el de Coya
Lleva nel bolsu un tarucu
Y al abultá-y la panoya
Tásquense elles notru sucu.
*
En tiempu la segadera
Cuando’l calor más aprieta
Saquen los mozos manguera
Pa chiscar a La Coleta.
*
Les mociquines d’Uvieu
Piensen que valen pa muchu
Tienen a les pites mieu
Y enxamás golieren cuchu.
*
Vivía cerca’l Vallín
La sobrinona del cura
Y el carteru coxiquín
Calcaba-y la pata dura.
*
Dicen que rondaba Minu
Pela nueche a la cartera
Como si esguilara un pinu
Una vieya corretera.
*
La Nisalina nació
Na fonte de La Brimal
So madre ellí la parió
A la sombra una nisal.
*
Díxo-y Antón el de Xicu
A la nieta la maestra
Que-y dio un puñazu’n focicu
¿Tú qué estudies, pa minestra?
*
A la entrada de La Pola
Nuna ventana vas ver
A los mozos a la cola
D’una cama ensin facer.
*
Cuando Cencio’l de Ramón
Diba a San Roque d’Areñes
Tola sidra d’Anxelón
Bebía nes sos madreñes.
*
Yera Placidín nomáu
Na escuela La Travesera
Una vez que fue al teyáu
Quitáren-y la escalera.
*
A esti Placidín famosu
Perdoctu y pereminente
Toles moces del Raposu
Morrín por echa-y el diente.
*
El cura de La Rozuca
Fuese a echar la burra al agua
Y cuando la vio fartuca
Ensugola cola enagua.
*
Cuando Lin diba al mercáu
Pela feria Castañeres
Dexaba atrás el ganáu
Y apalpaba delanteres.
*
Dicen que na Peridiella
Hay un ñeru de culiebres
Onde aprende la reciella
A enroscase nos pesiebres.
*
Por más que pienses que aciertes
Non te fíes de to padre
Que de tantu picar puertes
Non sabe quién ye to madre.
*
Dicen que a la calle Oscura
Diba Rosendón a moces
Y como la burra’l cura
Acababa siempre a coces.
*
Adientru no de Corina
A la vera Les Dos Erres
Fundía Sindo Cortina
Les sos últimes dos perres.
*
Si quieres que non te ruxa
La piedra cuando-y das trapu
Al segar cola Maruxa
Calca pación nel cachapu.
*
Taba Oscarón na cocina
Oyendo la Pirinaica
Mientres tantu la vecina
Tocaba-y la balalaika.
*
Hoi fui al médicu y resulta
Que debo guardar reposu
Porque tando na consulta
Picome un tabán nel cosu.
*
Sandalio’l de la Fontica
Ye el gallucu la corrada
No-y quedó por gallar kika
Pero desplumolu Amada.
*
Manolucu’l de Pimientu
Mirái lo que ye el destinu
Siempre lu llevaba’l vientu
Y un día matolu un pinu.
*
Cansó Berta d’aguantalu
Dexolu y fuese con otru
Pero al pocu violo malu
Y volviose a estrar al potru.
*
Cuéntes-y tou lo que mayes
Toles nueches col maridu
Y fartuques de migayes
Del banquete al to queridu.
*
Lloraba la so muyer
Cuando morrió Baltasar
Desconsolada al paicer
Por que fuera a despertar.
*
Fartástite ayer de vinu
Y prometisti la gloria
Güey ayudote’l destinu
Y perdisti la memoria.
*
Quíxote pol interés
Por que-y comprares sostenes
Cuando cumplió ventitrés
Dexote arrodiada penes.
*
Yeres llisa d’espetera
Cuando me fui pal serviciu
Y al volver en primavera
Salinte les dos de quiciu.
*
Suelta Maruxa a esnalar
Pela ventana al xilgueru
Y ponlu frescu a cantar
Tolos dis nel tendederu.
*
Empondéreste que ties
De puxu y rixu la fama
Siempre te salen tres pies
Espatexando na cama.
*
Casose Saru’l d’Ester
Cola más fea la rodiada
Y quedose como quier
Ensin vieyos arrodiada.
*
A arremoyar el gañate
Fuisti coles tos amigues
Ficísti-yos chocolate
Pa amoyecevos les migues.
*
Edita la de Avelino
Gustaba-y a Gonzalín
Yera ella como un pino
Y el yera como un tapín.
*
Cuando me disti l’asaltu
Y se calmó la resfriega
Saliote un chuzu más altu
Que‘l chorrón de La Llariega.
*
Peles Feries diba Bique
Col vigulín afináu
Rondando a una que dique
-y lu ponía afiláu.
*
A min gústenme los mozos
Que tengan puxu y saleru
Poner garduñes nos pozos
A ver si me cae un buen tueru.
*
Non se fartó la parienta
Col pan que Pichu-y bregó
Y dexola tan famienta
Que lo de todos prebó.
*
Anina cuerri la voz
Y asoleya bien les coples
Qu’engalanen esti blog
Y como tu tan en topless.
*
Y equí va la despidida
Nesta nación tan remota
Espachurra bien la vida
Hasta que non salga gota.
