Edvard Elsrud, “A la caza l’osu en Vassfaret”. Versión del noruegu.
Cuando Olea-y enseñó al osu “aquello” qu’ella tenía.
A l’Osu Buenmozu llamaranlu de xuru asina polo buen mozu que será, quesiyó, lo mesmu qu’el mociquín de los cuentos populares. L’osu retirábase un suponer cuando una muyer arremangaba les sayes hasta’l piscuezu enfrente d’ellí; esto cuéntase en bien d’hestories antigües, y d’aquella non yera normal tampocu andar con ropa d’abaxu.
Teniendo como tien esti asuntu un xeitu una migaya delicáu, cédo-y la pallabra dafechu a G.O. Lien, tal cual elli lo refier na revista la sociedá de cazaores en 1931. Y a la contra que l’otru osu enantes mencionáu, esti ye sobremanera un buen machu.
Fue p’hacia la cabaña d’Aurdal onde asocedió esto. La moza Olea y la mociquina Olaug yeren tengo entendíu foriates, y ello ye que dende l’entamu vese que non dormíen quepreste peles nueches, porque sintíen al osu andar agolifando com’un gochu enriba la cuesta:
“Espertárenles una nueche unos berríos y un estropiciu pa contra’l corral de les oveyes. Echárense arriba como si s’allamparen na cama, arramplaren coles vestimentes más necesaries, enfilaren mediu en carnes p’afuera y echaren a correr a gritu peláu pa la oveyera.
Pero enantes qu’allegaren yá tenía abiertu la puerte l’osu. Pel ruxíu los cencerros sintieren que la reata andaba escapáu, y non fueren quien a tornar el ganáu allerciáu hasta nun allegar a Storebekk. A la que volvieren cola reatada descubrieren qu’había una oveya muerta adientru na cuadra.
Una tardi allá unos dis sintieren un estropiciu temible de daqué animal pesáu que saltó’l cercáu. Non había otru remediu que prender una foguerona enfrente la cuadra. Olea empollerose nel teyáu, y d’ellí achisbó ñidiu al osu echáu tres la pila cuchu, y por eso tuvieren que mantener calecío tola nueche. Como s’arrimara diben arrobexá-y estielles ardiendo a la bestia aquella.
Al otru día, a la qu’allegaben segadores a la cabaña, arremetió l’osu contra la reciella nel monte. Non valieren glayíos, berríes nin bulla. Nun se dexó amedranar l’osu, y aquello non paicía tener igua, pero Olea non yera de les que se s’acoquinen.
Tenía ella oyíu munches veces que l’osu tien la fuercia diez homes y el sintíu d’una docena, y que de ser ello ciertu bien podría ella facelu avergoñase. Non se necesitaba otro que ser un pocu llixera pa atrevese. Medios traíalos ella consigo de sobra ellí onde diba. Lo que facía falta non yera otro qu’apurase enantes que l’osu feciera estragos col ganáu. Entós va ella y arremanga con rixu la so saya hasta’l piscuezu y vase derecha enfrente l’osu, esnuda entera de rodielles hasta’l cintu.
Ello resultó ser una ocurrencia efectiva. Al osu entró-y vergoña y escabullóse, cásique como coibíu y apuráu. Pero a la que se diba volviose a mirar. Unes cuantes veces.
Sicasí la satisfacción de la pastora pola fazaña suplió bien pocu. Al cabu unos dis tenía yá l’osu repuéstuse lo bastante del atarrecimientu y tornó a les andaes, pero Olea, que lu cuidaba como un ferreru, atravesóse-y enmediu y arremangóse cola so mesma arma, y fizolu ver bien lo muyer que yera.
Otres veces que se fue contra l’osu d’aquelles traces, espurríase elli nes pates d’arrás, tornábase enfrente d’ella y quedábase esperando que viniera pa contra elli como p’acoyela en samantu. Pero en cuantes qu’ella se-y arrimaba bien abaxaba l’osu y díbase d’ellí.
Una vez que fueren echar les vaques a Fjellelva pal sur d’Andalsdammen, presentose l’osu y tarazó-y la ubre a una. Depués saltó-y encima y taragañola nel piscuezu encima’l llombu. Olea non pasó la ponte a tiempu pa atornalu, pero al pocu ellí taba ella pa facer ver a l’osu a les clares que se llargara d’ellí. Y tal fue lo qu’elli fizo, y eso que taba yá rellambiéndose cola sangre.
Olaug tuvo entós qu’esnalar p’Aurdalssetra, d’onde los segadores salieren pitando, ún con un azáu que garró nel aire, porque escopetes non traíen con ellos. Nel intre tornó l’osu delles veces más, pero volvía dise en cuantes qu’Olea se-y enseñaba con tol so esplendor natural.
Claro qu’a la vaca hubo qu’escuartizala. Pero con poner en práctica el remediu pal osu, non solo salvara Olea lo más del ganáu, tamién descurrió daqué de lo que la xente pudo falar munchos años y décades depués”.
