Coples llixeres
A Ana
Buenes tardes lo primeru
Que me pongo a desvariar
Y acabái de cacariar
Ellirriba’n gallineru.
*
Voi cantate equí unes coples
Pa animate nesta xera
Y que al compás con que soples
Se t’encienda la foguera.
*
Non sé si ye’l centenariu
O si son namás sesenta
Gocé tántu del calvariu
Que yá hasta perdí la cuenta.
*
Ai qué espesu y qué picante
Te salió güey el cocido
Será que te dio palante
Pela nueche’l to marido.
*
Cuando vengues a mío casa
Traime la preba’l tocín
Que yá sabes cómo engrasa
El mio Falo’n Samartín.
*
Dicen qu’allá pa l’Ablana
Baxa a l’Infiestu un nuviellu
A buscar ente la grana
Quién-y pulgue’l carapiellu.
*
Aquella muyer mexóse
De tántu descoyuntase
Por ver a Xuacu correse
De gustu ensin empalmase.
*
Cuando t’allegue la hora
Vas dexame de primicia
La pepitina qu’aflora
Pa vela yo cómo nicia.
*
Siempre pa la primavera
Cuando canten los malvises
Ábre-yos la ventolera
A les neñes les camises.
*
Na to cai una farola
Apágase cuando pases
Será porque pela Pola
Enciendes tántu qu’abrases.
*
Diba yo pa La Fontica
A por un sardu pación
Y noté una tarabica
Apusllando’n pantalón.
*
Dixo-y Mari la de Mon
Un día a César Fayuela
“Ven de nueche al mio balcón
Que yo te prenda la vela”.
*
Hai per Uvieu una esquina
Onde van los de Xixón
A reza-y a la Santina
Pa subir de división.
*
Les mociquines d’Uvieu
Van a la playa a Xixón
Que-yos unten el sobéu
Y-yos claven l’aguixón.
*
Nacisti baxo un ablanu
Ente’l cuchu y la pación
Y volvisti americanu
D’esfocicar per Xixón.
*
Va metiéndose payares
Y van menguando los díes
Cuando pares en Sevares
Pregunta por dos Maríes.
*
Cuando morrió El Caserón
Fixéren-y velatoriu
Y la fiya nun rincón
Descapulló’l tanatoriu.
*
Los de Ques son perfaroles
Los de Belonciu perfinos
Rellumen como los soles
Que se posen nos caminos.
*
Mio güela dio-y al Garruchu
Cuando la fue a cortexar
Un pastelín nun cartuchu
Que lu fizo empapizar.
*
La camarera del Cuetu
Que ta a puntu carambelu
Escalezse bien col nietu
Pa arremoyase col güelu.
*
La Faba d’Espinaréu
Non da abastu cola ablana
Llímen-yla col preséu
Un vecín cada mañana.
*
Nel baile Pin el de Coya
Lleva nel bolsu un tarucu
Y al abultá-y la panoya
Táscase ella notru sucu.
*
En tiempu la segadera
Cuando’l calor más aprieta
Saquen los mozos manguera
Pa chiscar a La Coleta.
*
Les mociquines d’Uvieu
Piensen que valen pa muchu
Tienen a les pites mieu
Y enxamás golieren cuchu.
*
Vivía cerca’l Vallín
La sobrinona del cura
Y’l carteru coxiquín
Calcaba-y la pata dura.
*
Dicen que rondaba Minu
Pela nueche a la cartera
Como si esguilara un pinu
Y echara la vida entera.
*
La Nisalina nació
Na fonte de La Brimal
So madre ellí la parió
A la sombra una nisal.
*
Díxo-y Antón el de Xicu
A la nieta la maestra
Que-y dio un puñazu’n focicu
¿Tú qué estudies pa minestra?
*
A la entrada de La Pola
Nun cuartu pisu vas ver
A los mozos a la cola
D’una cama ensin facer.
*
Cuando Cencio’l de Ramón
Diba a San Roque d’Areñes
Tola sidra d’Anxelón
Bebía nes sos madreñes.
*
Yera Placidín nomáu
Na escuela La Travesera
Una vez que fue al teyáu
Quitáren-y la escalera.
*
A esti Placidín famosu
Perdoctu y pereminente
Toles moces del Raposu
Morrín por echa-y’l diente.
*
El cura de La Rozuca
Fuese a echar la burra al agua
Y cuando la vio fartuca
Ensugóla cola enagua.
*
Cuando Lin diba al mercáu
Pela feria Castañeres
Dexaba atrás el ganáu
Y apalpaba delanteres.
*
Dicen que na Peridiella
Hay un ñeru de culiebres
Onde aprende la reciella
A enguedeyar nos pesiebres.
*
Por más que pienses qu’aciertes
Non te fíes de to padre
Que de tantu picar puertes
Non sabe quién ye to madre.
*
Dicen qu’a la cai Oscura
Diba Rosendón a moces
Y como la burra’l cura
Acababa siempre a coces.
*
Adientru no de Corina
A la vera Les Dos Erres
Invirtía Fontanina
Les sos últimes dos perres.
*
Si quieres que non te ruxa
La piedra cuando-y das trapu
Al segar cola Maruxa
Calca pación nel cachapu.
*
Taba Oscarón na cocina
Oyendo la Pirinaica
Mientres tantu la vecina
Tocaba-y la balalaika.
*
Hoi fui al médicu y resulta
Que debo guardar reposu
Porque tando na consulta
Picómi un tabán nel cosu.
*
Sandalio’l de la Fontica
Ye’l gallucu la corrada
Por gallar non dexó kika
Pero desplumólu Amada.
*
Manolucu’l de Pimientu
Mirái lo que ye’l destinu
Siempre lu llevaba’l vientu
Y un día matolu un pinu.
*
Cansó Berta d’aguantalu
Dexólu y fuese con otru
Pero al pocu violo malu
Y volvióse a estrar al potru.
*
Cuéntes-y tou lo que mayes
Toles nueches col maridu
Y fartuques de migayes
Del banquete al to queridu.
*
Lloraba la so muyer
Cuando morrió Baltasar
Desconsolada al paicer
Por que fuera a despertar.
*
Fartástite ayer de vinu
Y prometisti la gloria
Güey ayudóte’l destinu
Y perdisti la memoria.
*
Quísote pol interés
Por que-y comprares sostenes
Cuando cumplió ventitrés
Dexóte arrodiada penes.
*
Yeres llisa d’espetera
Cuando me fui pal serviciu
Y al volver en primavera
Salínte les dos de quiciu.
*
Suelta Maruxa a esnalar
Pela ventana al xilgueru
Y ponlu frescu a cantar
Tolos dis nel tendederu.
*
Empondéreste que ties
De puxu y rixu la fama
Siempre te salen tres pies
Espatexando na cama.
*
Casóse Saru’l d’Ester
Cola más fea la rodiada
Y quedóse como quier
De ningún vieyu arrodiada.
*
A la cabaña a fartate
Fuisti coles tos amigues
Ficísti-yos chocolate
Pa arremoya-yos les migues.
*
Edita la d’Avelino
Gustaba-y a Gonzalín
Yera ella como un pino
Y el yera como un tapín.
*
Cuando me disti l’asaltu
Y se calmó la resfriega
Salióti un chuzu más altu
Que‘l chorrón de La Llariega.
*
Peles Feries diba Bique
Col vigulín afináu
Rondando a una que dique
-y lu ponía afiláu.
*
A min gústenme los mozos
Que tengan puxu y saleru
Poner garduñes nos pozos
A ver si me cae un buen tueru.
*
Non se fartó la parienta
Col pan que Pichu-y bregó
Y dexóla tan famienta
Que lo de todos prebó.
*
Yo non tengo pa to madre
Más que palabres d’eloxu
Desde que falta to padre
Ponme la faba’n remoxu.
*
Al mío vecín entra a velu
Pela nuechi una enfermera
Porque dizque non ye quién
A dormir con ella fuera.
*
Nel mio pueblu a la boroña
Non-y ponen levadura
Por eso los de Piloña
Somos de la picha dura.
*
A la lluz d’una farola
Dixístimi que valía
Más tar tola vida sola
Que comigo un solu día.
*
Prometió-y que lu quería
Como la mosca la miel
Y pidió-y que si podría
Dexala que fuera infiel.
*
Los que más falen son todos
Los que tendrín que callar
Falen hasta polos codos
Ensin dexar rechistar.
*
Anina cuerri la voz
Y asoleya bien les coples
Qu’engalanen esti blog
Y como tu tán en toples.
*
Y equí va la despidida
Nesta nación tan remota
Estrapaya bien la vida
Hasta que non salga gota.
