Na muerte la madre
Cuando reclame la letal solombra
el to postreru alientu, el to mutismu;
cuando t’arrastre la que non se nombra
a les llendes lloñanes del abismu,
cuando te lleve’l sueñu per delante,
a la qu’el sol s’esñiza nel ocasu,
tal un rellumu alluma nun instante
y dura lo que dura dar un pasu
al precipiciu, ellí estaremos nos,
los que nacimos de les tos entrañes,
ente veles y músiques estrañes,
texendo la maraña del adiós,
y tu empobinarás hasta’l confín
del orbe, onde la nada non tien fin.
