Na muerte la madre
Cuando reclame la letal solombra
el to aliendu postreru, el to mutismu;
cuando t’arrastre la que non se nombra
pa les llendes lloñanes del abismu;
cuando te lleve’l suañu per delante,
mientres el sol afonda nel ocasu,
com’un rellumu alluma nun instante
y dura lo que dura dar un pasu
al precipiciu; ellí estaremos nós,
los que nacimos de les tos entrañes,
ente veles y músiques estrañes,
texendo la maraña del adiós,
y tu empobinarás hasta’l confín
del mundu, onde la nada non tien fin.
15.7.22
