MAR D’AMOR
Dexástime tirada na estacada
Como una fueya al borde del abismu;
Saltar o non saltar, vanu mutismu.
Sintí’l dolor roñar de la estocada
Taladrar hasta’l güesu, el cataclismu
Qu’arrasó la pasión de madrugada,
Otra escena d’adiós desesperada
Del eternu retornu de lo mismu.
Agora toca yá la despidida,
Devolveme la llave de mio casa,
Hestoria interminable que fracasa
Al cabu d’una cai ensin salida.
Desangrándose pela carretera
Posa un cuerpu fumiando na gatera.
•~•~•~•~•~•~•~•~•~•~•~•~•~•
CATÁLOGU PEDAGÓXICU
Hostiazu castañazu focicazu
Gochazu soplamocos solmenón
Maustazu morrillazu garrotazu
Sapiazu zarapicu coscorrón
Puñazu cibiellazu centellazu
Mampurniu ñarigazu bofetón
Llombazu costalada zurriagazu
Sopapu rodiellazu mochicón
Porrazu pisotón piña ñalgada
Llombada palicazu emburrión
Somanta estandoriazu puñetazu
Zapada afrellón pellá mocada
Llombazu zurra cuera cogotazu
Guantazu cintarazu piscozón
